Sextán söngvar fyrir sópran og tenór

Lagabálkur eftir Þorvald Gylfason við ljóð eftir Kristján Hreinsson

Sextán söngvar fyrir sópran og tenór eru sönglagaflokkur eftir Þorvald Gylfason prófessor við kvæði eftir Kristján Hreinsson skáld og heimspeking. Lögin eru samin fyrir sópran, tenór og píanó. Ljóðin og lögin fjalla um söknuð, sorg og gleði, viljann og vonina, ástina, lífið og listina. Hallveig Rúnarsdóttir sópran, Elmar Gibertsson tenór og Snorri Sigfús Birgisson píanó frumfluttu ljóðaflokkinn í Hannesarholti í Reykjavík 25. nóvember 2017. Skáldið flutti stuttar skýringar á undan hverju lagi og ljóði sem var varpað á vegg á vegg á bak við sviðið. Dagskráin tók um 80 mínútur í flutningi. Kvikmyndafélagið Í einni sæng ásamt Hljóðsmiðjunni tók konsertinn upp fyrir sjónvarp. Sjá kvæðin hér.

EFNISSKRÁ

1. Lágstemmdar línur (Sibelius)
2. Þegar ljóðið lifir (Sibelius) — síðasta lag fyrir fréttir 30. marz 2022
3. Móðurminning (Sibelius)
4. Við glugga um nótt (Sibelius)
5. Ekkert að óttast (Sibelius)
6. Minn eilífi draumur (Sibelius)
7. Lífsblóm (Sibelius)
8. Leiðin liggur heim (Sibelius)
9. Fagur engill fylgir þér (Sibelius)

10. Fögur mynd (Sibelius)
11. Tónlist hjartans (Sibelius)

12. Vilji vindsins (Sibelius)

13. Við gröfina þína (Sibelius)
14. Vonarglæta (Sibelius)
15. Sagan (Sibelius)
16. Ljúfur leikur (Sibelius)
17. Vertu hjá mér
18. Bros — síðasta lag fyrir fréttir 23. apríl 2024

LEIÐIN LIGGUR HEIM

Hérna er landið sem forðum svo fallegt ég sá,
fjöllin sem haustkaldir vindarnir náðu að sverfa,
lognríka myrkrið sem svefnvana sálin mín á
sælunnar fótmál sem hvorki mun eyðast né hverfa.

Hérna er húsið sem eilífa gæfu mér gaf,
gróskunnar vitund sem spor mín að foldinni dregur,
eldur sem lýsir upp draumanna dulúðarhaf,
djásnið í hjartanu, andanna fegursti vegur.

Birtan frá arninum hlustar á loganna ljóð,
léttfættur reykurinn svífur mót himneskum skuggum,
sólgulir bjarmarnir daðra við dýrðlega glóð,
dansandi stjörnurnar speglast í gegnsæjum gluggum.

Aftur fær hugur að leika um æskunnar land;
litanna dásemd sem hjartað í fyrndinni kvaddi,
aftur fer hugur um fjörunnar fegursta sand
sem fýkur í hita en sefur í brennandi gaddi.

Samstarfsaðilar

Þorvaldur Gylfason

Höfundur

Þorvaldur Gylfason hefur samið um 100 sönglög, m.a. Sautján sonnettur um heimspeki hjartans, Söngva um svífandi fugla og Sjö sálma við kvæði Kristjáns Hreinssonar. Sonnetturnar voru fluttar í Hörpu 2012 og 2013, Fuglasöngvarnir í Salnum í Kópavogi 2014 og sálmarnir í Langholtskirkju 2014 og í Guðríðarkirkju 2015. Eftir Þorvald liggja einnig Fimm árstíðir við kvæði Snorra Hjartarsonar.

Kristján Hreinsson

Höfundur

Kristján Hreinsson er skáld, tónskáld, söngvari og heimspekingur. Eftir hann liggja bráðum 40 bækur, nú síðast Verði ljóð (2015), Ég sendi þér engil (2016), Skáld eru skrýtnir fuglar (2016) og Koddaljóð (2017), auk fjölda hljómdiska.

Hallveig Rúnarssdóttir

Söngkona

Hallveig Rúnarsdóttir hefur sungið mörg óperuhlutverk á sviði, m.a. í Íslensku óperunni, og einnig erlendis og komið fram sem einsöngvari með hljómsveitum, m.a. oft með Sinfóníuhljómsveit Íslands. Undanfarin ár hefur hún einnig lagt rækt við ljóðasöng og haldið tónleika með þýzkum, frönskum og norrænum sönglögum. Á geisladiskinum Í ást sólar flytur hún íslenzk sönglög ásamt Árna Heimi Ingólfssyni piánóleikara. Hún hlaut Íslensku tónlistarverðlaunin 2013 sem söngkona ársins fyrir hlutverk Michaelu í Carmen eftir Bizet í Íslensku óperunni.

Elmar Gilbertsson

Söngvari

Elmar Gilbertsson hefur sungið mörg óperuhlutverk á sviði innan lands og utan, einkum í Hollandi og Belgíu og einnig í Frakklandi, Þýzkalandi og víðar. Hann hlaut Grímuverðlaunin 2014 sem söngvari ársins fyrir hlutverk Daða Halldórssonar í óperunni Ragnheiður eftir Gunnar Þórðarson í Íslensku óperunni og aftur 2016 fyrir hlutverk Don Ottavio í Don Giovanni eftir Mozart. Elmar hlaut einnig Íslensku tónlistarverðlaunin 2014 sem söngvari ársins í flokki sígildrar og samtímatónlistarog samtímatónlistar og aftur 2017 fyrir hlutverk Lenskís í Évgení Ónegin eftir Tsjækovskí í Íslensku óperunni.

Snorri Sigfús Birgisson

Píanóleikari

Snorri Sigfús Birgisson stendur í fremstu röð íslenzkra píanóleikara og er jafnframt mikilvirkt tónskáld. Eftir hann liggur fjöldi tónverka: einleiksverk, kammertónlist, raftónlist, kórtónlist, sinfónísk verk og sönglög. Tónlist hans er að finna á fjölmörgum geisladiskum og hljómplötum. Hann gekk frá lagaflokkinum í hendur söngvaranna tveggja.